Wikimedia Eesti

Võrokeelidse vikipeediä edimäne artiklivõistlus

Timahavva peeti edimäst kõrda võrokeelidse Vikipeediä artiklivõistlust. Võistlusõst võtiq ossa 9 kirotajat 14 artikliga. Teemaq, minkast kirotõdi, olliq väega mitmõsugudsõq: kultuuriluust ja -tegeläisist sugulasrahvidõ ja botaanikani.

Näütüses kirotõdi artikli Jaigi Juhanist, Oksaneni Sofist, Rosma koolist, katripääväst, Tarto Kivisillast, nõglapaiust ja väikust Tsiberi soomõ-ugri rahvast mansõst. Võistlusõlõ tull’ ka mitu väega hüvvä setokeelist ja seto kultuuri pututavat artiklit (nt Jakapäiv, Mõlapäiv). Kõiki artikliid saa nätäq ja lukõq võrokeelitsest Vikipeediäst, täpsämbähe lehe päält:

http://fiu-vro.wikipedia.org/wiki/Wikipedia:Artikliv%C3%B5istlus%C3%B5st_osav%C3%B5tjaq_artikliq_%282013%29

Parõmbidõ kirotajidõ ja kirotuisi välläkuulutaminõ ni avvohindo kätteandminõ oll’ Tarto Ülikooli Lõunõ-Eesti keskusõh (Lossi 3-134, Tarto) 13. piimäkuu pääväl kell 18.

Pääavvohinna ja lisas viil mitu eräavvohinda sai pruukja Sügüsene (Ene Suuvere), kiä oll’ kirotanuq viis väega hüvvä ja põh’alikku setokeelist artiklit, minkast kõgõ parõmbas hinnati artikli seto pühä Jakapäävä kotsilõ. Väega hüvvä ärq märkmist löüdseq ka pruukjaq Tsirgutii (Marju Varblane) ja Amyk (Annika Oselin), kiä olliq kirotanuq artikliq viiolimängjist Hiiobi Ottost ja Palu Jaanist. Niisama kiteti väega pruukjit Krõõt (Maike-Liis Rebane) ja Mruut (Mirjam Ruutma) artiklidõ Katripäiv ja Oksaneni Sofi iist. Vähämbide avvohindoga peeti meelen ka tõisi artiklidõ kirotajit.

Avvohinnaq olliq vällä pandnuq Kubija Hotell-Luudusspaa, andsambliq Zetod, Klapp ja Kiiora, Võro Instituut ni Tarto Ülikooli Lõunõ-Eesti keele- ja kultuuriuurmiisi keskus.

Võistlusõ kõrrald’ MTÜ Wikimedia Eesti. Süriin olliq Laanõ Valdis, Iva Triin ja Allasõ Tiia.

Ligemb teedüs võistlusõ kotsilõ: http://fiu-vro.wikipedia.org/wiki/Wikipedia:Artikliv%C3%B5istlus_%282013%29_vro

Võrokeeline Vikipeediä om luud aastagal 2005 ja parhilla om sääl päält 5100 artikli. Võro Vikipeediähe või vabalt artikliid kirotaq ja naid toimõndaq egäüts, kiä mõist võro keelen (vai ka seto, mulgi vai tarto keelen) kirotaq.

Uma ammõtlik Vikipeediä om parhilla 285 maailma keelel. Väikeisin keelin Vikipeediil om terven ilman tähtsä roll päält umakeelidse tiidmise jagamisõ ka naidõ kiili edendämisen, oppamisõn, tutvustamisõn ni laembalt maailma keele- ja kultuurikirivüse hoitmisõn. Väega pall’odõl keelil (ka võro keelel) om Vikipeediä ainugõnõ umakeeline entsüklopeediä. Pall’odõ maailma kiili jaos om taa kõgõ suurõmb vaba ja avalik umakeelidse kiräsõna läteq.

Kõrraldustoimkunna nimel

Jüvä Sullõv

25. Jun 2013 - Posted by | Määratlemata

Sorry, the comment form is closed at this time.

%d bloggers like this: